នៅប្រទេសកម្ពុជា ជនដែលមានមមុខងារការពារច្បាប់ ជាញឹកញយគឺជាជនដែលប្រព្រឹត្តអំពើរំលោភបំពានដ៏អាក្រក់បំផុត។ ជាពិសេស ស្ត្រីប្រកបរបរផ្លូវភេទដឹងការពិតទាក់ទងនឹងរឿងទាំងនេះ។ ស្ត្រី និងកុមារដែលពាក់ព័ន្ធក្នុងមុខរបរផ្លូវភេទប្រឈមនឹងការវាយដំ ការរំលោភសេពសន្ថវៈ ការបៀតបៀនកេរ្តិ៍ខ្មាស ការជំរិតយកប្រាក់ ការចាប់ខ្លួន និងការឃុំខ្លួនដោយបំពាន ការធ្វើការងារដោយបង្ខំ និងការប្រព្រឹត្តបែបបន្ទាបបន្ថោក និងឃោរឃៅដទៃទៀតក្នុងកណ្ដាប់ដៃរបស់នគរបាល ឆ្មាំសន្តិសុខការពារសួនច្បារសាធារណៈ មន្ត្រីរដ្ឋាភិបាល និងជនទាំងឡាយដែលធ្វើការនៅក្នុងមជ្ឈមណ្ឌល និងការិយាល័យដែលគ្រប់គ្រងដោយក្រសួងសង្គមកិច្ច អតីតយុទ្ធជន និងយុវនីតិសម្បទា។
អ្នកប្រកបរបរផ្លូវភេទបានប្រាប់អង្គការឃ្លាំមើលសិទ្ធិមនុស្សថា មន្ត្រីនគរបាលបានវាយលើពួកគេដោយប្រើកណ្ដាប់ដៃ ព្រនង់ ដំបងឈើ និងការប្រើដំបងឆក់។ មន្ត្រីនគរបាលបានគម្រាមកំហែងអ្នកប្រកបរបរផ្លូវភេទដោយអាវុធផងដែរ។ ក្នុងឱកាសខ្លះ មន្ត្រីនគរបាលបានរំលោភសេពសន្ថវៈស្រ្តីប្រកបរបរផ្លូវភេទក្នុងអំឡុងពេលដែលពួកគេស្ថិតនៅក្នុងការឃុំឃាំងរបស់នគរបាល។ អ្នកប្រកបរបរផ្លូវភេទខ្លះបានពណ៌នាអំពីស្ថានភាពនៃការជាប់ឃុំឃាំងរបស់ពួកគេនៅក្នុងមជ្ឈមណ្ឌលសង្គមកិច្ច ថាជាការគួរឱ្យរន្ធត់ជាមួយនឹងការដាក់កំហិតដល់សេរីភាពក្នុងការធ្វើដំណើរ ទទួលរង ឬបានឃើញការវាយដំ ឬការរំលោភសេបសន្ថវៈ និងមានអាហារ និងការថែទាំសុខភាពមិនគ្រប់គ្រាន់ជាដើម។